سیّدناحضرت مرزا غلام احمد قادیانی ؑ (1835-1908) جنہیں اپنی جوانی کے زمانہ سے ہی اسلام کی حمایت میں خدمت کی توفیق ملی، آنحضرتﷺ کی پیشگوئی کے مطابق بحیثیت مسیح موعود و مہدی معہودمبعوث ہوئے تو آپؑ نے 1889ء میں اللہ تعالیٰ سے اِذن پاکر جماعت احمدیہ کی بنیاد رکھی۔ جس کے بعد آپ کواپنوں اور غیروں ہر طرف سے شدید مخالفت کا سامنا کرنا پڑا مگر آپ تائید الہٰی سے اس قافلہ کو آگے سے آگے لے جانے میں کامیاب رہے۔ آپ کی وفات کے بعد نظام خلافت کا قیام عمل میں آیا جس کا بابرکت سلسلہ اللہ تعالیٰ کے فضل سے آج تک جاری ہے، الحمدللہ۔ اس وقت حضرت مرزا مسرور احمد صاحب ایدہ اللہ تعالیٰ بنصرہ العزیز آپؑ کے پانچویں خلیفہ کی حیثیت سے دنیا بھر کے212ممالک میں پھیلی ہوئی جماعت کی امامت و قیادت فرما رہے ہیں۔